ذكريات الحجر المنزلي ..

السلام عليكم ورحمة الله وبركاته 

أهلاً .. 

يمكن تكون أول تدوينة فيها كلام وسوالف بس فجأه وأنا أتصفح الاستديو لاحظت أن عندي صور وتجارب كثيرة سويتها بفترة الحجر حبيت أوثقها مرتبة للذكرى ..

طبعاً زي ما انتو عارفين فجأة وبدون سابق انذار كورونا حظر تجول ....... والكثيييير من الأحداث 

ممكن موضوع جلسة البيت ماكان الشي غريب بالنسبة ليا لأني غالباً أقضي وقتي في البيت بس شعور انك محبوسة مو حلو ولما فجأة تبغي شي الحمدلله بس على جميع النعم ..

وكمان الشي المختلف الأطفال الله يحفظهم صار أغلب وقتهم في البيت فتحاولي تشغلي وقتهم ..

طبعاً صارت تنازلات كبيرة من ناحية الأجهزه وأشياء كثيرة لان مانبغى نسبب ضغط أكبر وعدت الأيام فجأة أحس مع انشغالنا بالأخبار " لو أحد يقولي ان الفترة كانت ثلاث شهور أو أكثر مااصدق مر الوقت سريع ..

احس عشنا حالة ترقب وانتظااار للجاي ... 

أنا عشت أغلب الفترة في المطبخ صراحة كان صديقي الصدوق الحمدلله عليه بما ان مافي مطاعم فكان كل يوم طبخ وحفلة وتجارب جديدة كان هوا الممتع عندي حتى لو طولت فيه عاااادي أنبسط لما الاقي أن أغلب الوقت مرر ..

وكمان صح ترتيب كل جزئية في البيت وكل يوم ندور شغلة وتنظيم لركن في البيت 😂

فكرة انتشار الانجازات واستغلال الوقت اعتبرها فكرة أدت لضغط نفسي للبعض صحيح ان حلو استغلال الوقت بس أهم شي الراحة النفسية ..

.................................

قبل الحضر باسبوع يمكن كنت في تويز ار اص 

وصدفة أخذت بزل والحمدلله على دي الصدفة 

كان منقذ في البداية أخذت راحتي فيه وطولتتت مره 

لما كنت أركب وابحث كان يجيبلي صداع التركيز

واسيبها وارجع اليوم الثاني بس مااحكيكم شعور الانجاز جميييل ،

آخر قطعة تحطيها واوووو .. 

تحمست طبعاً اني أجيب صور ثانية انتظروني 😇

حبيت شكل البزل وهوا موزع ع الأرض حتى بعد 

ماتركب خليته شهر يمكن مسوي جو لوحة أرضية ..

.................................

وفجأة طحت على حساب مجد جاها مبدعة 

في الرسم المائي ومطلعة كتاب للتعليم 

قررت آخذه أتعلم الأساسيات بما ان عندي

 الألوان والكراسة بس دايم ألون كذا بس 

هنا بعض النتايج و الجلسات اللي طلعت فيها 

حبيت الكتااب مرة أنصح أي وحدة ماعندها أساسيات تقتنيه ..

      

...............................

هنا بعض الأعمال لاشغال الوقت ..

صنعنا صلصال منزلي 

حبيت النتيجة صح ابدا مو نفس الجاهز

بس تجربة جميلة

ومدة حفظها قليله ..

الطريقة :

كوب دقيق ، ربع كوب ملح

ملعقة زيت ،ملون طعام 

ربع كوب مويه أو أكثر حسب الاحتياج ..

ينحفظ في كيس مغلق باحكام ..

...........................

اللعبة اللي انتشرت أيام الحضر 

سجاد مطبوع عليه أرجل بجهات مختلفه 

طبعت عدة أرجل وحطيتهم باتجاهات متعاكسة

وكانت لعبة ممتعه 👏

..........................

دائماً أفكر أقتني جهاز قهوة بس كان شي مؤجل دائماً 

لأني مو مدمنة ومو لازم أشرب كل يوم 

فكنت أحس ان مو شي لازم

فجأة وبدون سابق انذار قرار مفاجئ

أتوقع كنا نحتاج شي يسلينا 

وموضوع فجأة تبغي قهوة ماصار موجود ..

صار شي لازم الحمدلله فكرنا فيها هذاك الوقت

لان بعدها صارت منتهيه من كل المحلات

وفجأة الاسعار طااااارت الدبل 

الكل حس بأهميتها وحلو الواحد 

يكون يعرف يسوي قهوته وعلى مزاجه

أكيد مالنا غنا ع الكافيهات بس مو شي يومي ..

وقع الاختيار ع الجميلة بريفيل باريستا 

فبالي أجهز طاولة خاصة بس الوقت مو مناسب فهنا مكانها المؤقت ..

.......................

بعض الابداعات وبداية التفنن ..

طبعاً اللي قبلها خلوه مستور :)

.....................................

طبعاً أبدعنا وفتحنا كافيه وكل يوم نجرب مشروبات 

هذا من ابداعات الكافيه حقنا لدرجة مع الحماس 

انكسر الخلاط << بس صحبتكم كانت شبه مبسوطة

لأن عيني على خلاط فنان فكان عذر قوي .. 

<< بدون فتنه لو سمحتو 😓

تم الاقتناء بحاول أسوي تدوينة عنه بس أجربه فتره 

.................................

وهنا سويت هوت شوكليت للعيال برسمة

بس الموضوع فتحلي باب كان مقفل

دحين مايبغو هوت شوكليت مو مرسوم 

ياسر النُتفه لما اعطيه الكوب يقول في رسمه 

................................

بدون سابق انذار فجأة حفلة تخرج وكان عليا الكيكة 

لقيت كرتون الريد فيلفيت كيك موجود

واسرع كريمة وصارت كيكه جميلة كأول تجربة

طبعاًهنا كانت البداية حبيت مرررة موضوع الكيك 

حتشوفو الابداعات لاحقاً 😉

وفجأة حبيت أفاجئ المتخرجة بكوب قهوة من يدي البارستيه

ومن حسن حظها طلعت أجمل رسمة 

اللي الى اليوم ابغى اعرف كيف رسمتها 😂

..........................................

من بداية الحضر كنا منشغلين بموضوع الدراسة

وكيف فجأة صارت الدراسة عن بعد وكان شي متعبب

و مشتت بما ان الموضوع جا فجأة والمدارس مو مستعدة ،

حاولنا نجاري الموضوع والحمدللة عدت أبداً

مايتقارن التدريس بالدوام بس الحمدلله كان كل الجهد ع الأم ،

 المدرسة قررت تسوي حفلة عن بعد و كان قرار مونس ولطيف منهم ..

 كان بث مباشر طلبو صور واضحة لكل طفل عرضوها في البث ..

شعور غريب .. ومُختلف 

بس لازم نعيش تفاصيل الفترة لأن ماتنعاد ..

طبعاً جهزت قهوتي وسوينا فعاليات صغيرة 

جبنا كب كيك و هدية نجاح ..

عينكم ع الرسمة لأن مو كل يوم تزبط ..

.................................

ايوا انا الانسانه اللي كنت أحس القلاية الهوائية 

شي زائد وماله اهميه زيو زي الفرن .. 

وأيام الحضر زادت حاجتنا للقلي وأنا انسانه 

ضد القلي تماما أولا علشان الزيوت وثانيا

 علشان حفلة التنظيف بعد القلي .. 

أول كنا لما نبغى برقر ساندوتش اي شي 

غالباً من برا هذي الأيام بدأناها بالبرجر 

وكل يوم خلطة برجر وقلي وحفلللله تبكي

 << متأزمة المهم فجأة جربت قلاية فيليبس 

حرفياً قلت ويني عنها من زماااان صرنا 

مانستصعب البرجر و الستريبس الجاهز 

والبطاطس في دقايق و براحة نفسيه 

ان مافيه زيوت << المهم تغيرت فكرتي تماماً 

وأنصح الكل يجيبها << بدري 

طبعاً دي الصور قبل القلاية الجميلة

جربو قلاية فيليبس حتدعوووولي 💘

                                                                    ...................................

                                          

وجا رمضان .. كانت فكرة تزيين المكان 

مو فبالي أبدااااً 

فجأة كعادتي الدائمة أتحمس آخر اللحظات 

نفضت الكسل وطلعت الشنطة اللي  فيها 

الزينة لكل سنة .. وقصيت ورق كلمة رمضان

ومررره من زمان نفسي بفرشة حمرا 

تسوي جو في المكان فجأة أفتكر هذي الفرشة

اللي كل يووم قدامي وكنت أول ابحث في 

ايكيا وكل مكان وماشفت الموجود

المهم حاولت أركب وأرتب بالموجود

وحبيت كل شيييي الحمدلله ..

رمضان بدون التزامات 😇

فعاليات يومين من رمضان :)

.....................................

كثيير أشياء جربت أسويها كانت أول مرة 

وأشياء ماكنت أفكر في يوم أجربها

زي التميس ، الباخمري

عيش البطاطس .. مااتوقع كلها عندي لها صور 

بس كانت تجارب جميلة ..

.................................

طبعاً كعادتي المتأخرة قبل العيد بكم يوم 

شفت فكرة عيادي ودخلت مزاجي

وحبيت أسويها والحمدلله انجزتها بأسرع وقت 

ابغاها توصل قبل العيد ..

طريقة التغليف والتفاصيل هنا ..

..............................

عيد هذي السنة كان برعاية البنياتا 

جهزنا ركن بسيط وطبعاً زي ماعرفتو اني تحمست 

وصار الكيك عليا 

طبعاً لازم من الأغلاط البسيطة بس حبيت النتيجة مررره ..

ومنجد هذا العيد اكتشفنا ان العيد نحنا اللي نصنعه

بفرحتنا واستعدادنا 

وميزة هذا العيد أن مستحيل يغيب عن الذاكرة ..

فطور العيد ..

أحلا شي واللي ماكنت أتوقع انو يصير هيا غيبوبة العيد الموسمية 

توقعت أن حيكون اليوم خفيف مو زي كل سنة 

بس الحمدلله صارت الغيبوبة جد نومه العيد هذي لها طعم مُختلف ..

هنا بعد الغيبوبة كيكة العيد وكوب قهوة من يدي الجميلة << أي اعتراض :)

تفاصيل الكيكة من جوا ..

الكيكة كانت ل ذ ي ذ ة << بدون مجاملة لنفسي ..

طبعاً فيها أغلاط فنية بس نتداركها المرات القادمة 

                                    

صديقة الحجر حبت ترسل رد ع الأظرف 😢💘

..............................

طبعاً أيام العيد كانت حظر كامل ..

فبعد العيد بكم يوم فتح الحظر و صار جزئي 

جهزنا كيكة جزر لطيفة و لذيذة 

ورحنا نسوي حفلة العيد عند أهلي :)

أتوقع التطور واضح :)

........................

الفطور المُفضل هذي الفترة 

مايونيز و خردل 

بيبي جرجير 

بيض مسلوق و طماطم 

رشة فلفل أسود و ملح 

شطة :)

..........................

أتوقع عرفتو كيكتي المُفضلة 

كيكة البرتقال بصوص شوكليت :) 

حنزل طريقتها ع المدونة 

.............................

صح مابشرتكم من مهاراتي الجديدة كانت حلاقة الشعر 

أنا اللي كنت أخاف أقص خصلة صغيرة 

قصيت وتفننت :)

باقي شوية وأفتح حلاق خاص 

الحجز بالدور :)

.................................

أول قهوة بعد الحضر 

طلعة سريعة لجرير المكان المفضل وفرنش فانيلا من تيم هورتنز ..

                                                                   ..............................

................................

أتوقع بعد فك الحضر الناس روقت لدرجة أنهم سوو كل شي تتوقعوه صغنون

وأنا ماأقدر ما أجرب شي كتكوت زي كذا 😇

................................

أي شخص وصل لهنا شكرررراً

حبيت فكرة المقتطفات في تدوينة ..

دائماً يكون عندي أفكار أو يوميات بسيطة

ماتستاهل تدوينة كاملة فحلوة الفكرة حطبقها دائماً..

وبعد ماكتبت ورتبت الصور منجد استشعار للنعم وكيف انها كثيرة 

وانا ذكرت ان ماكأنها ثلاث شهور ..

الحمدلله دائماً و أبداً ...